احنا ليه بنقول كده؟!

لو إنت مصري.. بجد وبحق وحقيق أكيد في يوم من الأيام ركبت.. مترو.. أتوبيس.. ميكروباص..
ولو ركبت.. حاجة من دول فأكيد مشيت في الشارع-
ولو مشيت.. في الشارع فأكيد سمعت أصوات الكلاكسات والزحمة والهيصة..
ولو سمعت.. الأصوات دي فأكيد سمعت الناس وهي بتتكلم..
ولو سمعت.. الناس وهي بتتكلم فأكيد سمعت الشباب الحلوين اللي زيك كده وهم برضه بيتكلموا"
- "لأ وشفت لما البطل طلع ".............." زعيم العصابة
ده بيحصل يعني كده في السريع، وحتى يعبروا عن إعجابهم بالفيلم.. واخد بالك
"لأ طبعا أنا هاطلع أشرف من "........." وهاجي معاك
"هع هع هع تصدق إنت إن أمك هي اللي "....." بجد"

بقى عادي خالص إنك تكون ماشي مع والدتك أو أختك وتلاقي واحد بيهزر -آه والله بيهزر- مع صاحبه فيروح شاتمه بوالدته.. ويا ريت شتائم عادية -ده إذا كان فيه شتائم عادية أصلا

اللي يجنن إنك تلاقي الأخ المشتوم بيضحك جدا وفي منتهى السعادة.. وبعدين مايسكتش بقى سيادتك.. لأ.. تلاقيه رد على صاحبه ده ويقوم شاتمه برضه شتيمة أكثر قبحا متعلقة بالأم

شيء يدعو للـ"......." الصراحة

وبعد ما كانت الألفاظ دي بيتم تداولها على نطاق سري وبشويش وبخجل..
يعني في ركن في الشارع..
أو في آخر حتة في الجامعة..
أو على بوابة المدرسة..
أو في قعدة على القهوة..
أو حتى في أوضة مغلقة..

ماعادش فيه الكلام ده..
دلوقت ممكن تسمع الألفاظ الـ"........" دي في كل حتة إنت ماشي فيها.. وفي أي وقت صبح أو ليل..

وكمان الأمر مش مقتصر على شريحة واحدة من الشباب ممكن تقول عليهم مثلا مثلا.. مش متعلمين أو حتى عايشين في مكان مش راقي..

ده يمكن الشباب المتعلم المتنور الحلو هو اللي بيقول الألفاظ دي أكتر من الشباب الأمي

وياريت الأمر واقف عند إن الشباب –الذكور اللي بشنبات- هم اللي بيقولوا الألفاظ الـ"......" دي

والسؤال هنا..
وده من إيه ده؟

احنا متفقين إن لكل جيل لغته الخاصة به
بس هي لازم اللغة دي تكون فيها ألفاظ "........." ولا مؤاخذة؟
ولو كنت من الشباب اللي بيستخدم الألفاظ دي..

خلينا نسألك السؤال الإجباري بتاع مذيعات التليفزيون..

"إيه شعورك وإنت بتقول الألفاظ دي؟"

وإيه اللي بيخليك تقولها؟
ويا ترى بتشعر بالخجل بعد ما تتلفظ به.. ولا ده حصل أول مرة.. وخلاص بقى؟
وليه بترضى إن حد من أصحابك يقول لك كده؟
وياترى إنتم شايفين إن دي مشكلة أصلا تستحق نتكلم عنها..؟
ولا خليك إيزي يا عزيزي..
والعملية في العادي يعني..
ومافيش حد بيكون قاصد إن يشتم أهل زميله.. كله هزار يعني؟
موضوع عجبنى وحبيت اشوف رايكم فيه

هى الدنيا كده

شكررررررررا

مشكور على الموضوع ده

تقبل مرورى

احمد البوشى

سبايكي حبيبي
موضوعك جميل
ومهم جدا جدا
وياريت لو جات علي الام
دول دخلوا الدين في وسط الشتايم
واكيد الكل عارف وبيسمع
يلا ربنا يهدي الشباب

تقبل مروري يا سبايكي

مشكور يا بلال
علي موضوعك
هو طبعا كلامك صح
انا بسمع الفاظ زباله بجد
وياريتها علي الولاد وبس
انا كمان بسمع بنات وستات بيقولوها
ومش لاقية سبب للوقاحة دي بجد
ربنا يهديهم
احنا ليه بنقول كده؟! Aa633a9c17